अशी काय ग आजी तू

अशी काय ग आजी तू

अशी काय ग आजी तू? अशी काय ग आजी,

मोठ्या कॉलेजात शिकवत होतीस,

तरी कॉम्पुटर मधलं सोप्पं सोप्पंही,

तुला कसं ग काही समजत नाही?         

अशी काय ग आजी तू? अशी काय ग आजी,

एवढी मोठी झालीस तरी,

गुळदाण्याचा लाडू,अन पोह्याचा भात    

तुला काहीच कसं येत नाही?

अशी काय ग आजी तू? अशी काय ग आजी?

 रोज लपंडाव खेळतो तरी

शोधून शोधून दमतेस पण   

एकदा सुद्धा पकडत नाहीस

अशी काय ग आजी तू? अशी काय ग आजी?

 स्वप्नातली माझ्या नीलपरी,

निळ्या डोळ्यांची अन छान सोनेरी केसांची    

तुला कधीच कशी ग दिसत नाही?

अशी काय ग आजी तू? अशी काय ग आजी?

 पण अशी कशी ग तू आजी,

रोज नव्या गोष्टी सांगूनही

तुझ्या गोष्टी संपत नाहीत,

अन कुशीत तुझ्या झोपल्यावर

थंडी कशी वाजत नाही?

अशी कशी ग तू आजी, अशी कशी ग तू आजी!

Audio Recording

(Recorded by: Sawani Datye)

ज्योतीG (jyotigandhe28@gmail.com)